Policia e Shtetit paralajmëron për tentative mashtrimi në WhatsApp
Autoritetet shqiptare kanë vënë në dukje një valë të re sulmesh kibernetike që synojnë të marrin kontrollin e llogarive të WhatsApp. Qytetarët këshillohen të jenë vigjilentë.
Policia e Shtetit u ka bërë thirrje qytetarëve të tregojnë kujdes pas identifikimit të rasteve ku mesazhe dhe lidhje (linke) mashtruese po qarkullojnë me qëllim marrjen e kontrollit të profilit të WhatsApp.
Sipas informacioneve të publikuara nga policia, individët që kryejnë këto mashtrime zakonisht dërgojnë mesazhe që kërkojnë nga përdoruesi të klikojë në një link, nën pretekstin e votimit në një konkurs apo konfirmimit të një veprimi.
Më pas, ata i kërkojnë viktimës të zbulojë kodin 6-shifror të verifikimit të WhatsApp, i cili dërgohet në telefonin e përdoruesit. Ky kod përdoret nga sulmuesit për të regjistruar llogarinë në një pajisje tjetër, duke siguruar kështu kontrollin e saj.
Autoritetet shqiptare këshillojnë qytetarët që të mos klikojnë në asnjë link të dyshimtë, edhe nëse ai prezantohet si i dërguar nga kontakte të njohura. Gjithashtu, theksohet rëndësia e ruajtjes së kodit të verifikimit të WhatsApp dhe të mos ndahet me askënd.
Si masë shtesë mbrojtëse, policia rekomandon aktivizimin e funksionit "Verifikimi me dy hapa" (Two-Step Verification) brenda aplikacionit. Në rast dyshimi për komprometim të llogarisë, këshillohet veprimi i menjëhershëm për rikuperimin e saj dhe njoftimi i të gjithë personave të kontaktit.