Forcat bullgare i shtojnë kontingjentin e KFOR-it në Kosovë me 97 ushtarë
Një kontingjent i përbërë nga 97 ushtarë bullgarë është nisur nga qyteti Stara Zagora për t'iu bashkuar misionit paqeruajtës të NATO-s, KFOR, në Kosovë. Ushtarët do të shërbejnë për gjashtë muaj në Komandën Rajonale Perëndimore.
Një kontingjent prej 97 ushtarësh bullgarë ka nisur udëtimin nga qyteti Stara Zagora për t'iu bashkuar misionit paqeruajtës të NATO-s, KFOR-it, në Kosovë.
Pjesa kryesore e kontingjentit përbëhet nga anëtarë të Brigadës së Dytë të Mekanizuar "Tundja", të cilët do të vendosen në Komandën Rajonale Perëndimore, me bazë në kampin "Villaggio Italia".
Sipas informacioneve, shërbimi i ushtarëve bullgarë në Kosovë do të zgjasë gjashtë muaj. Gjatë kësaj periudhe, ata do të kryejnë patrullime, misione vëzhgimi dhe aktivitete të tjera për mbështetjen e sigurisë në zonën përgjegjëse.
Zyrtarë nga Ministria bullgare e Mbrojtjes deklaruan se ky dislokim konfirmon angazhimin e vazhdueshëm të Bullgarisë ndaj operacioneve të NATO-s dhe kontributin e saj për stabilitetin në Ballkanin Perëndimor.
Komandanti i Forcave Tokësore të Bullgarisë, gjeneralmajor Deyan Deshkov, theksoi se personeli ushtarak bullgar ka marrë pjesë në misionin e KFOR-it për 26 vite, duke fituar një reputacion të mirë për disiplinën dhe profesionalizmin e dëshmuar.
Para nisjes për në Kosovë, ushtarët morën bekimin dhe një ikonë të Shën Gjergjit, shenjtit mbrojtës të ushtrisë bullgare, si simbol mbështetjeje dhe urimi për një shërbim të suksesshëm.