Planet për modernizimin e rrjetit hekurudhor dhe infrastrukturës rrugore në Maqedoninë e Veriut
Qeveria po punon në projekte të rëndësishme infrastrukturore, duke përfshirë një linjë të re hekurudhore që synon të lidhë Shkupin me Shqipërinë, si dhe përparimin e autostradave kryesore në vend.
Zëvendëskryeministri dhe ministri i Transportit, Aleksandar Nikolloski, njoftoi se po zhvillohet dokumentacioni për ndërtimin e një linje hekurudhore që do të lidhë Shkupin me Tetovën dhe Gostivarin. Ky projekt, i mbështetur nga Bashkimi Evropian, është pjesë e Planit të Rritjes dhe synon të lehtësojë trafikun ndërqytetës, duke reduktuar kolonat dhe ndotjen e ajrit.
Sipas planit, faza e parë përfshin lidhjen e kryeqytetit me Tetovën dhe Gostivarin, ndërsa fazat e mëvonshme parashikojnë zgjerimin drejt Kërçovës, Ohrit, Strugës dhe përfundimisht lidhjen me Shqipërinë. Ministri shprehu pritshmërinë që hapat konkretë të nisin vitin e ardhshëm, me qëllim që udhëtimi ndërmjet Tetovës dhe Shkupit të bëhet më i shpejtë dhe më efikas.
Sa i përket infrastrukturës rrugore, Nikolloski konfirmoi se ndërtimi i autostradës Tetovë–Gostivar po ecën sipas planit, me pritshmëri që kilometrat e parë të përfundojnë vitin e ardhshëm, ndërsa projekti i plotë të jetë gati deri në fund të vitit 2028. Ai theksoi se çështjet e shpronësimit janë zgjidhur dhe po punohet për zhvendosjen e linjave elektrike.
Lidhur me rrugën Tetovë–Prizren, ministri bëri të ditur se aktualisht po hartohet projekti për tunelin, i cili pritet të jetë më i gjati në vend. Ky projekt po realizohet në bashkëpunim me Fakultetin e Ndërtimtarisë në Shkup dhe është pjesë e marrëveshjes ndërmjet qeverive të Maqedonisë së Veriut dhe Kosovës. Pas përfundimit të projektimit, do të përcaktohet vlera financiare dhe do të nisin punimet.