Hetim për dyshime helmimi në Han të Elezit, merret në pyetje pronari i lokalit
Policia e Kosovës ka intervistuar një person në cilësinë e të dyshuarit për veprën penale "Prodhimi dhe vënia në qarkullim e artikujve të dëmshëm ushqimor", pas raportimeve për disa raste helmimi pas konsumimit të ushqimit në një lokal në Han të Elezit.
Një mashkull kosovar është intervistuar nga Policia e Kosovës në cilësinë e të dyshuarit, në lidhje me dyshimet për prodhim dhe qarkullim të artikujve ushqimorë të dëmshëm. Intervista është zhvilluar më 15 korrik 2026, pas raportimeve se disa persona kanë pësuar helmim pas konsumimit të ushqimit në lokalin e tij në Han të Elezit.
Hetimet po vazhdojnë për të zbardhur plotësisht rrethanat dhe përgjegjësitë eventuale lidhur me rastin. Prokurori kompetent është njoftuar dhe ka autorizuar ndërmarrjen e veprimeve të mëtejshme hetimore për sqarimin e çështjes.
Qendra Kryesore e Mjekësisë Familjare në Han të Elezit ka raportuar për 90 raste me të vjella dhe diarre që nga 13 korriku. Tre nga këta persona janë dërguar për trajtim në Klinikën Infektive. Drejtoria e Shëndetësisë ka sqaruar se jo të gjitha rastet e raportuara janë domosdoshmërisht helmime ushqimore.