Dogana e Kosovës shënon rekord të ri me mbi 1 miliard euro të hyra
Institucioni doganor ka njoftuar se ka tejkaluar pragun e 1 miliard eurove në të hyra, duke shënuar një rritje prej 5.5 për qind krahasuar me periudhën e njëjtë të vitit të kaluar.
Dogana e Kosovës ka njoftuar se ka arritur një shifër rekord në mbledhjen e të hyrave, duke tejkaluar pragun prej 1 miliard eurosh për këtë periudhë të vitit. Sipas të dhënave zyrtare, shuma e inkasuar ka arritur në 1 miliard e 7 milionë euro.
Ky rezultat shënon një rritje prej 5.5 për qind në krahasim me të njëjtën periudhë të vitit të kaluar, kur ishin mbledhur 955 milionë euro. Institucioni vlerëson se ky sukses është arritur falë stabilitetit ekonomik, bashkëpunimit me bizneset dhe përpjekjeve për të luftuar ekonominë joformale.
Një ndryshim i rëndësishëm këtë vit ka qenë zbatimi i sistemit të deklarimit para arritjes së mallrave. Ky sistem u bë i mundur pas procesit të shtetëzimit të terminaleve doganore dhe eliminimit të tarifave për përdorimin e tyre, një çështje që ishte kërkuar për një kohë të gjatë në raportet ndërkombëtare të progresit.
Sipas Doganës, rezultatet fillestare të këtij sistemi janë vlerësuar pozitivisht nga komuniteti i biznesit. Institucioni ka konfirmuar se do të vazhdojë të punojë për përmirësimin e kapaciteteve operative dhe rritjen e efikasitetit në shërbimet e ofruara.