Specialja në Hagë: Vendimi për lirimin me kusht të Thaçit i takon vetëm gjyqtarit
Dhomat e Specializuara të Kosovës në Hagë kanë deklaruar se vendimi për lirimin me kusht të Hashim Thaçit, përfshirë dorëzanin prej 50 mijë eurosh, i takon ekskluzivisht gjyqtarit kompetent. Ky vendim do të merret në përputhje me ligjin dhe rregulloret, duke përcaktuar edhe arsyetimin përkatës.
Nga Dhomat e Specializuara të Kosovës në Hagë është bërë e ditur se vendimi lidhur me kërkesën e mbrojtjes së Hashim Thaçit për lirimin me kusht, si dhe ofrimin e garancive financiare, duke përfshirë një dorëzani prej 50 mijë eurosh, i takon vetëm gjyqtarit.
“Është gjykatësi i vetëm ai që vendos për paraburgimin në përputhje me ligjin dhe rregulloren,” kanë sqaruar përfaqësuesit e Speciales, duke theksuar se vendimi përfundimtar do të lëshohet së bashku me arsyetimin përkatës në kohën e duhur.
Përveç garancisë financiare, kërkesa parasheh që Thaçi të mos largohet nga territori i Kosovës, të dorëzojë pasaportën dhe të gjitha dokumentet e udhëtimit. Gjithashtu, ai do të duhet të përmbahet nga publikimi i çdo deklarate publike në media apo rrjete sociale dhe të mos diskutojë çështjen e tij me askënd përveç ekipit të tij mbrojtës.