Opozita siriane ka deklaruar se vendi është “çliruar” pasi forcat e saj hynë në Damask dhe njoftuan se Presidenti Bashar al-Assad është larguar nga kryeqyteti në një destinacion të panjohur.
Festime të mëdha shpërthyen në Damask dhe pjesë të tjera të vendit, përfshirë kufirin me Libanin fqinj, ku shumë sirianë të zhvendosur vendosën të kthehen në shtëpitë e tyre. Ky moment historik shënon fundin e një lufte brutale 13-vjeçare dhe më shumë se gjysmëshekulli të sundimit të familjes Assad.
Reagimet Ndërkombëtare:
-
Kombet e Bashkuara:
Geir Pedersen, i dërguari i posaçëm i OKB-së për Sirinë, deklaroi se “është e rëndësishme që të arrihet një zgjidhje politike gjithëpërfshirëse që garanton unitetin dhe stabilitetin e vendit”.
-
Kina:
Pekini deklaroi se shpreson që Siria të kthehet në stabilitet sa më shpejt të jetë e mundur dhe njoftoi se po ndihmon qytetarët kinezë që të largohen nga Siria në mënyrë të sigurt.
-
Gjermania:
Ministrja e Jashtme Annalena Baerbock e përshkroi rënien e Assad-it si një “lehtësim të madh” për miliona sirianë, duke paralajmëruar se vendi nuk duhet të bjerë në duart e radikalëve.
-
Izraeli:
Amichai Chikli, ministri izraelit për çështjet e diasporës, deklaroi se avancimet e opozitës në Siri “nuk janë arsye për festë”, duke kërkuar forcimin e vijës së mbrojtjes së Izraelit në Lartësitë Golan.
-
Italia:
Ministri i Jashtëm Antonio Tajani njoftoi se po ndjek me shqetësim zhvillimet në Siri dhe se ka thirrur një takim emergjent për situatën.
-
Turqia:
Ministri i Jashtëm Hakan Fidan deklaroi se qeveria siriane ka rënë dhe se kontrolli i vendit po ndryshon duar. Ai bëri thirrje për unitet mes grupeve opozitare dhe siguri për rajonin.
-
Emiratet e Bashkuara Arabe:
Anwar Gargash theksoi se aktorët jo-shtetërorë nuk duhet të shfrytëzojnë vakumin politik që ka krijuar situata në Siri.
-
Shtetet e Bashkuara:
Shtëpia e Bardhë njoftoi se Presidenti Joe Biden po ndjek me vëmendje zhvillimet në Siri dhe se është në kontakt të vazhdueshëm me partnerët rajonalë. Presidenti i zgjedhur Donald Trump deklaroi se al-Assad ka “ikur nga vendi” dhe humbi mbështetjen e Rusisë.
-
Jemeni:
Ministri i informacionit të qeverisë së njohur ndërkombëtarisht deklaroi se plani i Iranit për zgjerimin e ndikimit nëpërmjet milicive sektare po shembet, ashtu si në Siri dhe Liban.
-
Filipinet:
Departamenti i Punëve të Jashtme të Filipineve bëri thirrje për përmbajtje dhe shmangien e dhunës, duke shprehur shqetësim për sigurinë e qytetarëve filipinas në Siri.
Lajmi është publikuar nga RT Balkan për ju.