Një studim i ri i publikuar së fundmi tregon se stërvitjet me intensitet të lartë mund të ndihmojnë në shtypjen e hormonit të urisë, ghrelin, veçanërisht tek femrat. Ky hormon është i njohur për rolin e tij në stimulimin e oreksit dhe sinjalizimin kur stomaku është bosh.
Si ndikon stërvitja tek “hormoni i urisë”
Trupi djeg kalori vazhdimisht, edhe kur është në qetësi. Kur ushtroni, kërkesat e energjisë rriten dhe djegia e kalorive shtohet, duke çuar shpesh në rritjen e ndjesisë së urisë. Megjithatë, kjo nuk ndodh gjithmonë, pasi stërvitja mund të shtypë gjithashtu oreksin, veçanërisht në intensitete më të larta.
Studimi përfshiu 14 të rritur (8 burra dhe 6 gra), me një moshë mesatare prej 43 vjeç për burrat dhe 32 vjeç për gratë. Të gjithë pjesëmarrësit kishin një BMI mesatare prej 22, duke mos qenë mbipeshë. Gjatë eksperimentit, secili pjesëmarrës përjetoi tre seanca të ndryshme: pa ushtrime, ushtrime me intensitet të moderuar dhe ushtrime me intensitet të lartë.
Matjet për ghrelinin total, acylated ghrelin (AG), dhe deacylated ghrelin (DAG) u morën para dhe pas stërvitjes. U mat gjithashtu niveli i laktatit, një nënprodukt metabolik i lidhur me lodhjen e muskujve. Pjesëmarrësit raportuan perceptimet e tyre për urinë, ngopjen dhe dëshirën për të ngrënë.
Rezultatet treguan se stërvitja me intensitet të lartë shtypi DAG për të dy grupet, ndërsa tek gratë, të cilat kishin nivele më të larta të ghrelin-it në fillim, u pa një ulje dramatike e AG-së. Kjo sugjeron se gratë mund të jenë më të ndjeshme ndaj efektit të shtypjes së oreksit përmes ushtrimeve.
Megjithatë, ulja e ghrelin-it nuk përkoi gjithmonë me një ulje të ndjeshme të oreksit të perceptuar, duke treguar se mekanizmat e tjera mund të jenë në lojë.
Pse ka rëndësi intensiteti i stërvitjes
Efekti i ushtrimeve në oreks dhe nivelet e ghrelin-it ndryshonte sipas intensitetit të stërvitjes. Stërvitja me intensitet të lartë kishte ndikimin më të madh në uljen e ghrelin-it tek burrat dhe gratë. Megjithatë, perceptimi i urisë ishte më kompleks.
Tek gratë, si stërvitjet me intensitet të moderuar ashtu edhe ato me intensitet të lartë çuan në rezultate të ngjashme për urinë e perceptuar, që ishte më e lartë krahasuar me kontrollet pa ushtrime. Tek burrat, stërvitja me intensitet të lartë uli ndjeshëm urinë e perceptuar, ndërsa ushtrimet me intensitet të moderuar rritën urinë.
Hulumtuesit vlerësojnë se laktati, një nënprodukt i stërvitjes me intensitet të lartë, mund të jetë çelësi për shtypjen e ghrelin-it. Kur trupi prodhon më shumë laktat sesa mund të përdorë, ai kalon pragun e laktatit, dhe ky proces mund të ndihmojë në reduktimin e oreksit.
“Ndryshimet e shkaktuara nga ushtrimet në ghrelin u shoqëruan me rritjen e niveleve të laktatit, i cili është propozuar si një mekanizëm i mundshëm për shtypjen e ghrelin-it,” theksoi Alice Thackray, PhD, një eksperte në metabolizmin e ushtrimeve.
Mesazhi kryesor
Stërvitja ka një marrëdhënie komplekse me oreksin, duke e stimuluar ose shtypur atë. Sipas hulumtimeve të reja, intensiteti i ushtrimeve dhe gjinia janë faktorë kryesorë që ndikojnë tek oreksi.
Studiuesit nga Universiteti i Virxhinias zbuluan se ushtrimet me intensitet të lartë reduktojnë ndjeshëm nivelet e ghrelin-it, veçanërisht tek femrat. Megjithatë, nevojiten kërkime të mëtejshme për të kuptuar më mirë mekanizmat që lidhen me rregullimin e oreksit përmes ushtrimeve.
Lajmi është publikuar nga RT Balkan për ju.